ثمانية أشياء ماكاتعرفهاش على حياة الممرضين

:متوقع منهم يعرفوا لكولشي -

فاش المريض كايسول على الحالة الصحية ديالو خاص الممرض يجاوبوا جواب مقنع، و هادشي كايتطلب رصيد معرفي علمي اللي يكون كافي و مضبوط

:كايتعاملوا مع مواد خطيرة-

كل نهار ،  الممرض تايكون عرضة لمجموعة من المواد و السوائل البيولوجية اللي تقدر تكون خطر عليه و تسبب ليه فعدة مشاكل صحية.

:التعامل مع عائلة المريض-

فبعض الأحيان ماكايكونش المريض هو المشكل بل عائلتوا اللي التعامل ديالها كايكون غير معقول ، و هنا كايضطر الممرض باش يخدم المهارات التواصلية ديالو على أساس يعرف يوجه المعاملة للمجرى المناسب.


:مشكل حمل أوزان ثقيلة-

ممكن جدا أن الممرض يلقا راسو مضطر باش يهز مريض اللي الوزن ديالو ثقيل ، و هادشي ممكن يكون خطر عليهم بجوج، رغم انه كاين الناس اللي متخصصين بهاد الخدمة الا انه الممرض مرة مرة كايلقا راسو وجها لوجه مع وضعية حرجة.

:المعهد مكايقريكش كولشي-

و كيفما كايقولوا فكل المهن : اي حاجة قريتيها غير نساها ،لأن الواقع حاجة أخرى .
و فعلا فالتمريض عالم بوحدوا اللي 3 او 5 سنين غير كافية للالمام بجميع الجوانب ديالوا.


:ماكاينش وقت محدد فالخدمة-

سالا الممرض الساعات ديالوا و باقي تابعاه الخدمة، كايعني انه غايزيد من الوقت ديالوا باش يكمل جميع الاجراءات اللي خاصين حتى يكمل عاد باش يمكن ليه يغادر، و هذا لأن المسألة هي.مسألة حياة شخص او موت.

:مسؤول عن أكثر من مريض-

فالمستشفى، كايكون عدد كبير من المرضى و كل ممرض كايكون مسؤول على واحد العدد معين، و غالبا كايكون عدد كبير و هادشي كايزيد من صعوبة المأمورية و الجهد اللي خاص الممرض يعطيه.

:

:مواقف الموت-

كل نهار ممكن الممرض يشوف عدة مشاهد اللي كاتكون مؤلمة او حادة فبعض الاحيان و هذا اللي ممكن يشكل خطر على الصحة النفسية ديالوا

الخلاصة أنه مهنة التمريض فيها بزاف ديال الحوايج اللي  ماكاتبانش من برا ، فقط من داخل المجال.